ٹیکسلا:مستقبل کے چیلجنز سے نمٹنے کے لئے طلباء کو جدید ریسرچ سے استفادہ حاصل کرنا ہوگا، لیفٹیننٹ جنرل عمرمحمود حیات

ٹیکسلا(ڈاکٹر سید صابر علی )چیئرمین پی او ایف بورڈ اور چیئرمین بورڈ آف گورنریونیورسٹی آف واہ لیفٹیننٹ جنرل عمر محمود حیات نے کہا ہے کہ مستقبل کے چیلجنز سے نمٹنے کے لئے طلباء کو جدید ریسرچ سے استفادہ حاصل کرنا ہوگا،نوجوان قوم کا مستقبل ہیں ،جہد مسلسل ،محنت لگن اور جستجو سے ہی پر وقار مقام حاصل کیا جاسکتا ہے،دنیا میں انہی قوموں نے ترقی کی منازل طے کیں جہنوں نے تعلیم میں اعلیٰ مقام حاصل کیا،طلباء کی تعلیمی استعداد بڑھانے کے لئے تمام وسائل بروئے کار لائے جارہے ہیں،ان خیالات کا اظہار انھوں نے یونیورسٹی آف واہ کے تیسرے کانووکیشن سے بحیثیت مہمان خصوصی خطاب کے دوران کیا،تفصیلات کے مطابق یونیورسٹی آف واہ کے تیسرے کانووکیشن کی پُر وقار تقریب یونیوسٹی کے آڈیٹوریم میں منعقد ہوئی جس میں گریجویٹس میں ڈگریاں اور میڈلز تقسیم کیے گئے۔ اس موقع پر لیفٹیننٹ جنرل عمر محمود حیات، ہلال امتیاز (ملٹری) چیئرمین پی او ایف بورڈ اور چیئرمین بورڈ آف گورنر مہمان خصوصی تھے۔ اس موقع پر مہمان خصوصی لیفٹیننٹ جنرل عمر محمود حیات، ہلال امتیاز (ملٹری) چیئرمین پی او ایف بورڈنے اپنے خطاب میں کہا کہ یونیورسٹی کے کانووکیشن میں شرکت میرے لیے باعث مسرت ہے۔ انہوں نے تمام گریجویٹس کو مبارکباد دیتے ہوئے کہا کہ آپ کے لیے زندگی کے حقیقی چیلنجز کا آغاز ہو رہا ہے اور مستقبل کے ان چیلنجز سے نمٹنے کے لیے حکمت عملی سے کام لینا ہو گا۔ انہوں نے مزید کہا کہ قوم کے مستقبل کا انحصار آپ پر ہے اور یہ بات ذہن نشین کر لیں کہ کامیابی کے لیے کوئی شارٹ کٹ راستہ نہیں ہے ۔ محنت، لگن اور اخلاقی اقدار کی پاسداری اور اللہ تعالیٰ پر یقین کامل کامیابی کی کنجی ہے۔ چیئرمین پی او ایف بورڈ نے کہا کہ پی او ایف میں موجود ریسرچ اینڈ ڈیویلپمنٹ کی سہولیات، لیبارٹریز اور پی او ایف کے سٹیٹ آف دی آرٹ پیداواری یونٹس یونیورسٹی کے طلباء و طالبات کے عملی تجربات کے لیے ہمہ وقت حاضر ہیں جن سے بھر پور استفادہ کیا جا سکتا ہے۔ اس سے پہلے وائس چانسلر یونیورسٹی آف واہ ڈاکٹر خلیق الرحمان شاد نے اپنے خطبۂ استقبالیہ میں چیئرمین پی او ایف بورڈ کا شکریہ ادا کرتے ہوئے کہا کہ پی او ایف انتظامیہ یونیورسٹی آف واہ کے انفراسٹرکچر کو بہتر بنانے کے لیے ہر ممکن تعاون کر رہی ہے۔ انہوں نے بتایا کہ یونیورسٹی آف واہ کا معیار تعلیم پاکستان میں موجود یونیورسٹیوں سے کسی لحاظ سے بھی کم نہیں ہے۔ انہوں نے طلباء پر زور دیا کہ ملک و قوم کی ترقی کے لیے اپنی زندگیاں وقف کر دیں اس طرح یقیناًآپ کی زندگی محفوظ اور پُر سکون رہے گی۔ وائس چانسلر نے بتایا کہ یونیورسٹی کے بہترین نتائج اس بات کی نشاندہی کرتے ہیں کہ طلبا و طالبات کی شبانہ روز محنت کے ساتھ ساتھ فیکلٹی اور والدین کا اخلاص بھی قابل ذکر ہے وائس چانسلر نے کامیاب طلباء اور والدین کو مبارکباد دی اور ان کے لیے نیک خواہشات کا اظہار کیا۔ آخر میں مختلف فیکلٹیز میں اعلیٰ کارکردگی کا مظاہرہ کرنے والے طلبا و طالبات میں گولڈ میڈلز تقسیم کیے گئے۔مسٹر محمد بلال اور مس ہما اصغر کو بہترین گریجویٹ کا ایوارڈ اور گولڈ میڈل سے نوازا گیا۔